Gæðastund vikunnar !!

Vá ég er búin að sitja hérna við tölvuna síðastliðinn klukkutímann og þvílík afslöppun og notalegheit úff. Það rifjaðist upp fyrir mér að ég átti reikning á tónlist.is svo ég ákvað að athuga hvort hann væri virkur enn. Viti menn reikningurinn var enn í fullu gildi, svo ég fór að skoða mig um og datt inn á svæði sem heitir jólaútgáfan 2005. Ég skoðaði nokra diska sem eru nýútgefnir og datt sá þar nýja diskinn frá Garðari Thor Cortes og ákvað að kíkja á hann svona bara til að vita hvort drengurinn getur yfir höfuð nokkuð sungið (lesist með miklum fordómum og neikvæðni). Stuttu síðar sat ég gersamlega dáleidd og hlustaði á hvert lagið á fætur öðru í hálfgerðum trans með gæsahúð úr sælu. Þvílíkt notaleg röddin í manninum og lögin flest hreint frábær. Þetta kom mér skemtilega á óvart ég hef aldrei heyrt í honum áður og hef aldrei nennt að hlusta þegar ég hef séð til hans í sjónvarpinu vegna ýktra munnhreyfinga og annara hreyfinga, eins og svo mörgum svona STÓR söngvurum eru ansi tamar. En ef maður sér hann ekki heldur bara heyrir í honum þá er bara eitt orð sem ég á og það er VÁ. Ég get einlæglega mælt með diskinum hans ef fólk er á annað borð fyrir svona semi klassíska tónlist.